Donosti Cup-ek elikagai-hondakinak bioongarri bihurtzeko Europako proiektu batekin bat egin du

Donosti Cup-ek beste urrats bat eman du jasangarritasunarekiko duen konpromisoan, eta Europako proiektu aitzindari batean parte hartuko du. Horri esker, txapelketan sortzen diren elikagai-hondakinen zati bat bioongarri bihurtuko da.

Ausolanek kudeatzen duen Donosti Cup-eko jantokiak 6.000 pertsona ingururi ematen die zerbitzua otordu bakoitzean. Txapelketan sortuko diren hondakin organikoen zati batek bigarren bizitza izango du LANDFEED Europako proiektuari esker. Ekonomia zirkularreko berrikuntza-ekimen hau NEIKERek koordinatzen du, eta AZTIk parte hartzen du Europako sei herrialdetako beste 21 bazkiderekin batera. Bildu ondoren, hondakinak Fertinagrosen Terueleko plantara eramango dira, eta han bioongarri bihurtuko dira hartzidura aurreratuko prozesuen bidez.

Proiektu pilotu hau Horizon Europe Europako programaren barruan kokatzen da, eta haren helburua da HORECA sektoreko hondakinak oinarri biologikoko ongarri bihurtzea bideragarria dela erakustea, ingurumen-inpaktua murriztuz eta ongarri kimikoekiko mendekotasuna gutxituz.