Donosti Cup 2026 ofizialki aurkeztu da
Txapelketak uztailaren 6tik 12ra bitartean 32 herrialdetako 910 talde eta 15.000 futbolari baino gehiago bilduko ditu, eta berdintasunaren, inklusioaren eta jasangarritasunaren aldeko apustua indartuko du.
Donosti Cup 2026 martxan da dagoeneko. Astearte honetan, Donostiako Udaleko Osoko Bilkuren Aretoan txapelketaren 34. edizioaren aurkezpen ofiziala egin zen. Beste behin ere, Gipuzkoa nazioarteko oinarrizko futbolaren topagune bihurtuko da uztailaren 6tik 12ra.
Aurtengo edizioak marka guztiak hautsiko ditu berriro ere, 32 herrialdetatik etorritako 910 talde bilduz. Horrela, txapelketaren historiako ediziorik nazioartekoena izango da. Gainera, lehen aldiz parte hartuko dute Angola, Hong Kong, Estonia, Mongolia, Malaysia, Polonia, Puerto Rico eta Uruguaik. Horrela, 1992an Donosti Cup sortu zenetik parte hartu duten herrialdeen kopurua 90era iritsiko da.
Ekitaldian azpimarratu zen txapelketak uda oro Gipuzkoan sortzen duen eragin kirol, sozial eta ekonomikoa. Halaber, bi mahai-ingururen bidez, oinarrizko futbola, turismoa, berdintasuna, jasangarritasuna eta elkartasuna bezalako gaiak jorratu ziren. Bertan parte hartu zuten euskal erakundeetako ordezkariek, babesleek eta erakunde laguntzaileek, baita gonbidatu bereziek ere, hala nola Live Active Angolako GKEak, zeinak aurten txapelketan parte hartuko duen Donosti Cup Fundazioaren laguntzari esker.
Aurtengo berrikuntza nagusien artean daude Donosti Cup Txiki-ren ospakizuna, Donosti Cup Women's Day jardunaldia, txapelketako jokalaririk nabarmenenari emango zaion Vicky López Sariaren estreinaldia eta Donosti Authentics Cup-en edizio berri bat, kirol inklusiboago baten alde lanean jarraituko duena.
Inaugurazio ekitaldia ere aurtengo berritasun handietako bat izango da. Anoetako handitze-lanen ondorioz, ekitaldia Amenabar Arenara lekualdatuko da, eta lehen aldiz bi saiotan egingo da. Horri esker, 15.000 parte-hartzaile baino gehiagori ongietorria emango zaie txapelketaren hazkundera egokitutako formatu batean.
Txapelketak jasangarritasunarekiko konpromisoa indartzen jarraituko du ingurumenaren aldeko ekimen berrien bidez, eta berriro sustatuko ditu elkartasun-proiektuak, hala nola Donosti Cup Gaza eta Donosti Cup Fundazioak gonbidatutako taldeen parte-hartzea.
15.000 jokalari baino gehiagorekin, 2.254 partidarekin eta Gipuzkoa, Nafarroa, Bizkaia eta Ipar Euskal Herrian banatutako 60 zelai erabilita, ofizialki hasi da Donosti Cup 2026rako atzera kontaketa; kirola, elkarbizitza eta balioak berriz ere esperientzia ahaztezin batean uztartuko dituen ediziorako.
.
