Donosti Cup Txiki jaio da, txikienen futbol jaialdi handia

Donosti Cup 2026k etxeko txikienei zuzendutako jarduera berri bat izango du. Donostia Kirolarekin elkarlanean, datorren uztailaren 9an, osteguna, Anoeta estadioaren eta Miniestadioaren artean kokatutako Fan Zone gunean Donosti Cup Txikiren lehen edizioa ospatuko da. Arratsalde osoan futbola, dibertsioa eta elkarbizitza izango dira protagonista, 5 eta 8 urte bitarteko haurrek ere txapelketaren parte sentitzeko aukera izan dezaten.

17:00etatik 19:00etara doako 5x5 futbol txapelketa egingo da. Lagun taldearekin parte hartu nahi dutenentzat nahiz banaka izena eman nahi dutenentzat zabalik egongo da. Antolakuntzak berak osatuko ditu taldeak, inor jokatu gabe gera ez dadin.

Izena aurrez eman ahal izango da ondorengo formularioaren bidez (esteka), edo ostegunean bertan Fan Zone gunean, plaza guztiak bete arte.

Baina Donosti Cup Txiki futbola baino askoz gehiago izango da. Arratsalde osoan musika, zozketak, opariak, aurpegi-margoketa eta hainbat jarduera izango dira, parte-hartzaileek eta familiek txapelketako gune adierazgarrienetako batean jai giro paregabeaz gozatzeko.

Gainera, jardunaldiak amaiera berezia izango du. 19:00etan Miniestadioan jokatuko dira Orona Fundazioaren eskutik antolatutako Authentics Cup txapelketako finalak, adimen-desgaitasuna duten pertsonentzako futbol lehiaketa, Donosti Cupen barruan egiten dena. Antolakuntzak Donosti Cup Txikin parte hartuko duten haur eta familia guztiak gonbidatzen ditu harmailetara hurbiltzera, taldeei babesa ematera eta inklusioa, errespetua eta kirolak pertsonak elkartzeko duen gaitasuna balioan jartzen dituen esperientzia partekatzera.

Ekimen berri honekin, Donosti Cupek eta Donostia Kirolak haur guztiei kirola hurbiltzeko duten konpromisoa indartzen jarraitzen dute, jolasa, elkarbizitza eta balioak benetako protagonistak izango diren guneak sortuz.